Euphoria Tape - Try it with a lover!


Aus den Archivn von da aca, 04.10.95 - 10.10.95

Estascy@euphoria.com:
  The Euphoria Tape
  Do The Euphoria Tape alone the first time, and then 
  with a lover. It's a phenomenon you will feel within
  the first 3 minutes of use -- what you feel the rest of
  the time is unbelievable.

Josef Weisgram (k.u.k. biavadaumpfa):
  oiso i waas net, i woa no nia euphorisch bam tapezian, im genteu is
  ma dea kleista oiweu stoak aufn wecka gaunga...gaunz gleich ob
  allane oda mit meina frau. ans stimmt, de easchtn drei minuntn
  gengan no, da rest is unglaublich ...oed.
  oisdan hau di noch wollongong mit deine tapetn oida!

Heidrun Kirchweger:
  Do foillt ma a Gschichtl ein, wie's mia beim tapeziarn gongen is:
  I hob zerscht die bsuechedelischn 70er-Joahr Tapetn mit ana
  Rauhfasatapetn uewapickt, und nocha ongstrichn. Auf da Deckn woa a
  weisse Tapetn drauf, do hob i ma docht, do tuast anfoch weiss
  druewastreichn.
  No guat, am ersten Tog hob i oiso de schiachn Wondtapetn uewapickt,
  und am zweitn Tog hob i angfangen, de Deckn zum streichn. Wia i
  zirka a Viertl von da Deckn ghobt hob, machts platsch und de gonze
  Deckntapetn is owakummen, weu de nua mehr mitm Staub on da Deckn
  pickt is, und wiua dea feicht wurn is, hot ea ka Festigkeit mea
  ghobbt und is owaplatscht. Des blede woa dann, dass ma de Foab nocha
  fost no ausgongen war und no dazua Sunntag woa, jetzt hamma de Foab
  vadinnt und vadinnt, dass sa si hoit grod no ausgongen is.

Gerhild Kirchweger:
  ... und wia ned amoi des vadinnan mea ghoifn hod, homma nua mea um
  die zuk"unftign K"astn umadum gmoin, wei dahinta siagt mas e ned.
  Bled is erscht don wuan, wia die Heidrun ongfonga hot, des Zimma
  umzust"on...

Wolfgang Howdii Howurek:
  Jo, i hob aramoi Deckn dabezian woin, und nix zaumbrocht. Dabezian
  is iwahaupt ned meins, mid den nossn, fetzantn Bapialn
  umawiatschoftn :-)
  Wia mia de gaunze Scheissn wieda owekumma is, hobi's ohne wos zum
  Sogn zaumgramt, bin aum nextn Dog ins Woidviadl noch
  Heidnreichschdein gfoan, und hob ma von Rudda a Hoizdeckn koid, de
  hobi daunn auffegnogld. Jetz is dabeziad fiad Ewichkeid :-) Mid de
  Hoizdeckn bini vue eafoigreicha bein Dabezian, ohne Emozionen :-)

Heidrun Kirchweger:
  Jo, und wann der Krempl net long gnua eingwaakt wiard, donn pickt ea
  net, und wamman z'long waakt, donn wiaft ea Foitn oda z'reisst.
  Aussadem, wamma a lengare Wond hot, dann wern de Bahnen imma
  schiefa, und im Eck passt goa nix mehr zsamm.

  Nua: Wamma irgendwo"lche schiarchn oidn Tapetn obm hat, donn is des
  so vu" Oarbeit, de zum owakletzln, daunn de Wond neich spochtln, und
  donn dru"waferbln. Des zoiht si nua aus, wamma ewig in dea Wuhnung
  bleibt.

  [Hoizdeckn]

  Des is a guade Idee, owa de Wend komma net a no mit Huiz vakleidn,
  sunst kummt ma si vua wia in ana Oimhuettn oda ana Sauna.
  A gscheitestn is eh, wamma weisse Wend und an Parkettbodn hat, owa
  des hobms in de 70er no net gwusst, do homs liawa ois mit de buntn
  Tabetn und Tebbichbedn zuapappt, so wia beim Mundl...

Da Aboridschinie:
  >[weisse Wend und an Parkettbodn]
  De Schraufmziagarin hod accurat mein Kschmock! Waunst amoi noch Wean
  kimst, zeigi da unsare neiche Wonung. Owa mei Brifmaaknsommlung konn
  i da ned zeign, de zeitn san vuabei, do kriagat is vo meina
  Aborigineuse...

Heidrun Kirchweger:
  Und wos host fia Moewln? Ikea-ortige?

Erich Eder:
  Na, de Zeitn san aa vuabei... Scheene oide, de wos ma uns hoid so
  zommgsuacht hom...

Bernd Wender:
  Liawe Heidrun,
  heid muasida glei zwamoi widaschbrechn: Du hosd gschriem

  >Nua: Wamma irgendwo"lche schiarchn oidn Tapetn obm hat, donn is des
  >so vu" Oarbeit, de zum owakletzln, daunn de Wond neich spochtln,
  >und donn dru"waferbln. Des zoiht si nua aus, wamma ewig in dea
  >Wuhnung bleibt.

  (1) Oiso i hob des gmochd bei mia und i hobs hoiwad vafluachd, weu
  imma wieda a Schicht zum Vuaschein kumma is, und zum Schluus howi
  des gaunze Schlofzimma mid ana bradn Schbochtl voiflechig
  gschbochtld und daun weiss gschtrichn.
  Und i kaun da sogn, es hod si voi auszoit. Es woa zwoa a
  Hundsoaweid, owa jetzt denki nimma drau und gfrei mi nua mea.

  >Des is a guade Idee, owa de Wend komma net a no mit Huiz vakleidn,
  >sunst kummt ma si vua wia in ana Oimhuettn oda ana Sauna.

  (2) Aa ned woa. I hob mei gaunzes Vuazimma vatefet und des schaud
  need schlecht aus, ois nadua lossn nadialich, und i find des sea
  gmiadlich. des Vuazimma is fosd mei Lieblingszimma jetzt.

  >Am gscheitestn is eh, wamma weisse Wend und an Parkettbodn hat, owa
  >des hobms in de 70er no net gwusst, do homs liawa ois mit de buntn
  >Tabetn und Tebbichbedn zuapappt, so wia beim Mundl...

  ... ee kloa, gibt nix schenas wia weisse Wend, Bagettbedn und a
  vateefets Vuazimma -- und a boa Palatschinkn in da Kuchl.

Gerhild Kirchweger:
  >(1) Oiso i hob des gmochd bei mia und i hobs hoiwad vafluachd, weu
  >imma wieda a Schicht zum Vuaschein kumma is, und zum Schluus howi
  >des gaunze Schlofzimma mid ana bradn Schbochtl voiflechig
  >gschbochtld und daun weiss gschtrichn.
  >Und i kaun da sogn, es hod si voi auszoit. Es woa zwoa a
  >Hundsoaweid, owa jetzt denki nimma drau und gfrei mi nua mea.

  Ha, jez howi wen gfundn, dea des wiakli scho amoi soewa gmocht hot,
  und ned nua erzoet, dass des da ixuebsilon mit wenig Eafoig und vue
  Blog browieat hot.

  Oiso: Wia host Du des pickate Glumbat owa griagt? De Tapetn schaun
  fuachtboa aus, owa hoitn bombnfest. I hob scho Gschichtln gheat, von
  Brutalongriffn mit Kemi-Keule und Flex.

  Und donn, wenn des Zeigs endlich heruntn is, donn muass man de gonze
  Wond wieda grodspochtln, oda? Wia long dauatn des? I maan, i wue ned
  ewig aufs Einziagn woatn, wos eh no so long dauat.

  >(2) Aa ned woa. I hob mei gaunzes Vuazimma vatefet und des schaud
  >need schlecht aus, ois nadua lossn nadialich, und i find des sea
  >gmiadlich. des Vuazimma is fosd mei Lieblingszimma jetzt.

  Joo, wann's gross gnuag is, scho. Owa wannst mit da Hoizvataefelung
  de Hoeftn vom Raumvoluman vabrauchst, schauz bled aus.

  >... ee kloa, gibt nix schenas wia weisse Wend, Bagettbedn und a
  >vateefets Vuazimma -- und a boa Palatschinkn in da Kuchl.

  Bagett? Wo? Hungaaaaaaaaaaaaaaaaaaaaaaaaaaaaaaaaaaaaaa!!!!

  
B.Nowak-Teufl (Beabl):
  Befua mia g'heirat haum, hod mia mei Mau g'sogt - weatlich! - er
  "hod des Schlofzimma mid an Bfuscha dapeziat". Ich hob des
  joarelaung so vaschdaundn, das gewissamassn Grundkenntnisse
  vuahaundn san.

  Nia wea i vagessn, wia mia noch da Hochzeid des Vuazimma dapeziat
  haum. Ea hod nemli nua in Bfuscha gedungen und i hob des foisch
  vaschdaundn. 

  Imma no eaheitat owa mid an sauba dapeziadn Vuazimma (soewa is de
  Frau)