gschead Aus den Archivn von da a.c.a, 20.03.97 - 05.04.97 josef weisgram: oiso ans sog i eich, a weana kau niemois a richtiga gscheada sei! a gscheada is ollemoi ausn woidviadl oda sunstwo aus da browints...glaubds mas, i bi schliesslich sogoa a owagscheada! iwrigns: gschead kummt dahea, dass fria de leibeigenen bauan se de hoa oschean haum miassn auf befoe vo ianan grofn oda sunstign besitsa. a gscheada muass dahea aus ana gegnd sei wos zumindast no bauan gibt. des woat is daun ois obfaelliges schimpfwoat vawendet woan, so laung bis de gscheadn a bissl a soebstbewusstsein griagt haum und auf amoi stoiz drauf woan dass gscheade san. iatzn bedrochts zumindast i diregt ois kompliment. John Gruber: Oba Tschosef, du kaunsd do ka Gscheata sei mit deim Boat!! Des glingd ma zu paradox.. Isa: glingt da olmoehi bessa ? ;-) josef weisgram: > glingt da olmoehi bessa ? ;-) DU! pass na auf du, es wiad scho wida amoi a gelegnheit fia rode uawaschln gebn ... deamoi wisd as owa du griagn! zawuzlt da josef John Gruber: Vaeeades k.u.k. Kommidee, in lezda Zeid vameatn sich di Foelle wo des Wuat Gscheata zan Ausdruk kumman is. Es is a reine Gfuesoch wia ma des Wuat vawendat und es is sicha dos dea ane oda ondre "Gscheate" a untaschidliche geistigs Bued vau an Gscheatn hod. Di Weana sizn auf da obastn Schbrossn vau da Latta und schaugn obe auf'd Gscheatn. Gwisse Brovinzla sizn zundast und san stoiz a Gscheata zsein. Aundre san iagendwo in da Mittn und wissnd ned rechd obs stoiz oda beleidigd sein soin waun ane zua senna Gscheata sogd. Kiazlich woa a posding vaunan Kommidee Mitglid wo eagleat wuan is, dos di Gscheatn Leibeigene Paesanos gwesn san denna ma (um si leichda zu eakenna) de Hoar ogschnittn haum. Ois ob des notwendig gwesn war. Bi sicha dia hod ma a an aundre Meakmole eakonnd. Nichtzulezd aun iam guatn Aussegn und dia hochweatign Kleida...:) Nojo, im 1861 haum de Russn de Leibeignschofd aufghobn und auf amoi san hoid plezlich 40 Milliona Gscheata umanaundagiart und haum sich hoid nochn Wesdn ogsedz, wias hoid heid a da Foi is. Es is a echds Malör, wia scho da Napoleon des gsogd hod wias eam z'Austalitz den Oa.... hochzogn haum. Und i muass mid an gwissn Ausdrugg vau Zfridnheid und Stoiz dem Kommidee mitteuln, dos i, jezd, nach wochenlonga wissenschoflicha Analuese und hundatn vau Intavjus mit hochschdudiate Historika, endlichamoi "die" Eaklerung fia den Ausdrugg gfundn ho. Oisdann aufgebassd und mochds an Bukmark damitma in Zuakunfd des Wuat "Gscheata" entweda weglossd oda, im gesezdn Foi, richtig vawendet. Dos Wuat "Gscheata" is no ned so oid. Es is east kiazlich in da Woedschbroch easchienen. Kometnhofd. Friana haums schlimme Ausdrik vawendat fia Leid dia ned vau da gleichn Glassn kumman san oda vaum gleichn Schdomm. Se soin uneawent sein. Gscheata is east im 19. Joahundat (so im lezdn Drittl davo) auftauchd und hod sich einbiagat, weus eben a feina Ausdruk woa. :0 Wis ia jo olle wissds, san jo unsare frinan Heaschofdn vaum Schdomm der Habsbuaga und ihre Genossn und Genossinen, grosse Lebeleid gwesn. A bissl inzuechtig weus jo vo da Schweiz kumman san (uaschbringlich), oba nocha duachs guade Donauwossa an gwissn Schmee kriagd haum dea seinesgleichn gsuachd hod. Da Bluadschbuad woa jo damois den Gscheatn ned ealaubd. De haum jo nua diafn di Relein fiatan damids nocha vaum Heaschahaus haum kenna gjogd wean. Nojo, wias a sei, de Schdeiamoak und Kaerndn woan so de liabsdn Jogdgrinde dea Heaschofdn. So im diafsdn Guak und Medniztoi und auf da Sauoim (notabene) haums nocha efdamoi de Sau aussaglossn. Es woa a Gaudi. Und gjogd haums, und drunkn haums, und gfressn haums, und drunkn haums, und ...... haums dos nua so a Freid woa. Ma sogd dossas im Metniztoi mea Blaubliatige gebn soi ois wias in Wean jemois gho hod. Des hod goanix mid da Inzuchd zdua gho, na, gaunz im Gegnteu, di Gene dea Habsbuaga sind duatn schweastns vatretn. Immano. Brauch nua a Bued vaum meim Uagrossvota und Grossvota oschaugn und i maan i wea damisch. Di Lefzn hengan genau so oba wia beide oidn Kaisa. Und weu ma grod beim Kaisa san, bringd mi des zua eigentlichn Gschichd... Duads ma vazein oba i muass eich scho a bissl a Bued moin damid ois gloa is, wia dia Preissn sogn. Im Joa des Hean 1867 wuade dea Kaisa Fraunz Joseph I.gekroent, glab i zumindesd. Ea woa sea beschefdigd mid seine Birogratn und seine vuen Voeika und do hod ea hoid ned so vue Zeid gho fia di Famuelie. Nojo, wia hoid so a top Menedscha hoid is. Ma kauns eam jo ned vaibln. Hod ned vue dauat, san hoid seine Kinda hoid a bissl eignoatig wuan. Vaschded sich jo, wau ka schdrenge Haund umma is und imma nua a poa Zofn und a poa Eunuchn. Nojo, und da Gronprinz Rudoif dea sich jo schbetta soebsd umglegd hod, woa hoid ana vau dena Gschroppn dia hoid nocha gwuesse Begleideascheinungan zagd haum. Ma hods jo imma vaduschld oba ane vau seine Kusinan (so a richdigs glaans Misdvich wia ma so sogd) hod den Rudi in da Reissn gho. Weu ea si hoid ned hod megn und si eam oba fuachtboa megn hod, hod se nua druaf gwoatat bis se eam ans auswischn kunnd. Hod jo scho da Scheiksbia gsogd: nix is schregglicha ois wia a ooseaviate Oide.... Um di Gschichd kuaz zmochn, soid i jezd endlich amoi aufn Kean dea Soche kumman. Und jezd kummds. Oiso. ...:<' Wida amoi beim Jogn in da grianan Schdeiamoak, is da Rudi ned so glicklich. Ea is imma scho mea auf junge Hawara gschdondn ois wia auf Madln. Aun und fia sich jo nix Woedbewegendes. Oba jezd hodda so a blede Augwonheid gho, si ano a bissl zschminkn und Busnhoida aunzlegn. De Schdeira haum sich gwundat wos des fia a sexi Madl woa des do plezlich in da Uatschofd aufdaucht is, und wida vaschwundn woa, und wida aufdauchd is. De Schtoaschdeira haums sich jo den Heaschofdn nua kozbugglnd und mid vuen Griass Gott's Eia Gnodn aungnehat. Is e gloa. Da Rudi hod somid ibahaubd ka Schaunz ghobd jemois an liabm Schdeirabuam (so a la Schwoaznegga) kennazleana. Fixsakramend. Oba ea woa a eifoisreicha junga, guadsaussehenda Mau und hod sich a Schrategie augeignet di unhamlich eafoigreich woa. Und zwoa issa meisdns in an dichtn Buschn oda ana Hoselnussschdaudn, scheen getarnt drinnangsessn und hod gwoat bis a fescha, junga Schdoaschdeira daheagwondat kumman is. So auf ziaka 10 Meta Entfeanung hod da Rudi nocha sei Haund ausm Buschn ausseghoidn und laungsaum gwachdld und hod gsogd: "Gsch,Gsch,Gsch...hea da. Gsch,Gsch...hea da . De Schdeira san jo imma scho guadgleibige und unschuide Wesn gwesn und, haum sich da Haund gnehad. Gsegn haums jo in dem dichtn Schdeiralaub goanix weu da Rudi jo imma bei soichn Exkuasionan grian gedrogn hod. Gsch, Gsch..hea da.. Kaum sans in Griffnehe gwesn, hod da Rudi se a scho gschnappd. Zack. Eine ind Hoselnussschdaudn und an Kuss aufd Lippn doss nua so gschmadsd hod. Valauta Schregg doss des Gnedige Freilein so aggressif woa sans meistns schdockschdeif duatngschdondn und haum kan Muu gmochd. Und so is des dahingongan iba Jore hinaus. Und in da Zwischnzeid is hoid de Kusine imma eiffasichtiga wuan weu si hoid a gean amoi so an schmazendes Kuss gean gho hed. Auf olle Felle woa da Rudi wida amoi auf da Piasch und..Zack. widarum an keanign Buabn...und wias du Zuafoi hoid so wue, hod ea sich in an grianan Schdeirabuschn einegsezd dea so enoam gross woa wia a Haus. Wos ea ned gwussd hod, da sexi Rudi, is dos sei gamsige Kusine den gleich enoamen Buschn benuzn woide mit an ondan feschn, keanign Buam. De Kusine hods den Rudi nia gsogd doss se eam aufd Schlich kumman is, oba vau dem Tog au hod se den Rudi duachn Dregg zogn am Hof. Si hod umatuschld und kichand imma gsogd: Gsch, Gsch. hea da, hea da... Da Rudi woa boid dos Gelechda in Wean und dia besn Zungan haum im noch imma mea und mea zuagsedzd (Neid, e gloa) weu ea jo da Tronfoiga woa. Schlussendlich hod ea sich amoi offizioe eaglean woin und hod wos umagschdoddad vau: "ich habe diese jungen Burschen nua "Gscheata" genannd, damit sie nicht zu lustig werden." Des hod ned hinghaud. Oba dia Eaklerung des Tronprinzn hod dem Esdareichischn Wuatschodz enoam eaweidad. So, und des, meine Tamen und Hean, is dia Heakunfd vaum "Gscheatn".