Exklusivbericht vo da Rastafahndung


Aus den Archivn von da a.c.a, 01.10.97 - 06.10.97

Bernd Wender:
  Hobzas scho gheat? Ob heit dans Rasta-fahndn. I woa zeascht grod
  draussd in Wollongong, weu i noch Bambgans gsuacht hob (hob owa nua
  a Graugans xeng) und hob nochhea in Schwechat am Flughofn
  vuabeigschaut. Duat san lauta schwoaz auzogane Schdapomenna aum
  Schoita vo da LTU gschdaundn und haum in di Karibik eitscheckt -
  noch Tschamaika. Weu si haumm gheat, dass duat de Schaus bsundas hoch
  is, an Rasta z'findn.


Martin Schoepf:
  > Duat san lauta schwoaz auzogane Schdapomenna aum Schoita vo da LTU
  > gschdaundn ...

  Bay de schdapoleid is wuaschd, obs schwoaz auzogn san oda ned, se san
  genauso schwaa zum eakenna wia a schwoadskappla im züvü.

  > ...dass duat de Schaus bsundas hoch is, an Rasta z'findn.

  Des hob i aaun da gaundsn bolidischn disgussion ee ned vastaundn. Ois
  laie hob i glaubd, da sichd ma ee glei auf da strossn, wauns wöche san.
  I kau ma afoch ned vuaschdön, zuwos ma do an gombiuda braucht(und sogoa
  a gsez), ois anzige eaglearung hob nur, dass de gaunzn datn von de
  frisea haum und so ibabrüfn, wea se dreedloggs einedran lossd. Oba des
  gsez is e scho zschbed, weu der briafbombnhawara woa sicha scho beim
  frisea, jetzt muas ma ned rastafandn, sondan glotsnfandn, und des is
  hoid wesendlich schwara (sogoa i bin in dem foi daunn susbegd).


John Gruber:
  ...i kenn an Hawara mid launge, vaklebde und zottige Hoa dea unhamli
  grosse Tschoints rauchd und oiweu nua Regge Mjusik schbued.Soi i eam da
  Rastafahndung moedn?? Schdod dossa zan Frisea gaungan is uma Glodsn
  zmochn issa woscheinli no Ganada eigwondat.


Bernd Wender:
  > ...i kenn an Hawara mid launge, vaklebde und zottige Hoa dea unhamli
  > grosse Tschoints rauchd und oiweu nua Regge Mjusik schbued.

  ... und ea schaut da jedn Dog in da Frua bein Zentputzn ausn Schbiagl
  ins Xicht, und waast wos, ea butzt si a grod di Zent, owa mid da linkn
  Haund, woascheinli is a a Linkshenda, weu di Ua hod a auf da Rechtn.
  Du woitst eam ee scho oft auredn drauf, owa es geed ned, weu imma
  waunst ausetzt, wos zun sogn, wue ea a grod wos sogn, und wasst ee
  und uewahaupz ...


Da Feadl:
  ...du hosdas wida amoi eakonnd Mr. Bean-d! Des issa, dea schiache
  Hund... Di Rojel Kenedien Maunted Polis hod eam scho di Tschoints
  beschlaugnohmd fia medizinische Zwegge. Und im Koella undn haums a
  gaunze Badderie vau Haunfschdengl gfundn. Dia schiggnds nocha aund
  medizinische Odeilung dea Uni Wean fia di Schdudendn damids
  Soebsdexperimende duachfian kenan. Guensdliche Beatmung unta Einfluss
  vau Vasokonstriktivn Middln vua da Menopause....etc.etc.

  Eia Feadl, da Rastaman


Bernd Wender:
  A, jetzt vaschdee is. Und de mochn daunn Vasuach mid eanara Viechaln.
  Drum hod dea ane Mauntnhawara so an weissn Hund, weu dea si imma a
  boa Dschoints eineziegn muas, bevua a wos ins Fressnapfal griagt. Do
  wiada daunn imma gaunz bloss davo, dea Oame. Ois kloa, Feadl!