Empfoehlungen fia Weanarische Liada


Aus den Archivn von da aca, 26.06.95 - 11.07.95

Jeremy Pickens:
  Griass Eich, olle mitanaund!
  Endlich!  No a "Lurker" tuat postn zu diesa Gruppn.  I bin
  a Ami, bin no ned mitglied des Weanerisch Wiad Woedsproch
  Kommittee, tu owa gaunz gean Weanerisch lesn und sprechn.
  Am ende August wead i wieda in Wean sei.  I mechat wissn,
  ob irgendjemand vau eich ane Empfehlung fia guade weanerische
  Aufnahmen hod.  I maan, I hob schon einige tseh-dehs vaum 
  "Ostbahn Kurti" und aa des "Helmut Qualtinger ois da Herr
  Karl" dings, wo ea dupisch Weanerisch redet.  Owa I waass
  ned, wos es sonstn zu finden gibt.  Vuaschlaege?  Vuen dank.

Wolfgang Howdii Howurek:
  Sakra, Tscheremi, Du kaunst owa guad Weanarisch! Hosd des eh ned
  bein Sii Ei Ee gleand? :-)
  Wenga da Musi: hosd scho wos ghead von Ambros Woiferl, oda von
  Danzer Georg? Owa min Ostbaun Kuatl bisd eh ned schlechd drau. Da
  Ding, da Fendrich Reinhard foid ma no ei, und de Werger Schdeffi,
  odara de Tschess Gitti.
  Noch Wean kummsd, Ende August? Heasd, Oida, do weama Di in
  Augnschein nemma!

Ruul (k.k. bierkanzleirot mit'n muadstrum duascht):
  oiso, des is ned so afoch, weu ua vue leiwaunds zeig am moakt is.
  es haengt von deina stuerichtung o, wos da davo gfoin tuat, owa zan
  auhuachn und aussoatian hot's an oasch voi guade scheibm

  ois do waradn:

  de neuwirth extrem schrammeln (fias weanarische, zitat: "i und mei
    waumpm, mei schnitzl mei bia")
  de alkbottle (de buam fias tiafe, blade, fette laude wean)
  de mali nagl (fias oide wean)
  da heli deinboek (fias bluesige wean)
  da heinz conrads (fias nekrophile tiafe wean)
  da meia leif (fian gaunz tiafn schmaeh)
  da ambros und da danza san scho iwawuzlt und bringans nimma
  da hanse orsolitsch (fias potschate wean)
  da sowinetz kurtl (fias guade wean)
  da qualtinga (fias blade wean)
  de tsch(u)ess gitti is zan moik iwagwexlt und wiad aus dera listn
    gstrichn
  de drahdiwaberl (fias laute und exibitsionistische wean)
  da hirsch wickerl (fias balladige, schwoaze und voegel-wean)
  da sigi maron (fias roischtuiwean)
  da kreisla schurl (fias taubnvagiftn in de weana besal park)
  da moser hauns (fias raunzade, nuschlade wean)
  de dolli schmidinga (fias efrauzipiate wean)
  de ganymed (fias siebzga joa wean, owa de lalln englisch)
  in freak weber seine sackratten (fias vawaunzte wean)
  da ostbauhn kuati (fias gleisbehm wean)
  de tschuschnkapoen (fias integrative wean)
  de pluhar erika (fias helle proksch wean)
  da heller ande (fias pluhar wean)

  ignorian soitat ma:

  in bilgeri
  de opus
  de EAV (aussa da erschtn scheibm "cafe passe")
  in falco (dea is gspritzt)
  in fendrich (aussa de erschtn scheibm)
  ois wos im dunstkras von moik und hias is
  de steffi werga (fia de blade steiamoak)

  aus aundare bundeslaenda san zan empfoehn:

  de broadlahn und a haufn aundare, de wos voixmusik ned vamoikn tan

Joseph Berger:
  I was ned wos da de E A V ton hom.Na guat i ken de letztn scheibn
  net. Mei schwoga hod ma de Plottn mitn oitn Muatal gschickt, is scho
  a weu hea don hot ma a hiafla de Ce De gfladerd. Dea depp hot
  woascheinli ka Ohnung und hots weg gschmissn. Da text auf dera
  Plottn woa leiwand, oba do in Kanada is kan da dea des Zeig
  vadraht.Oiso wanst as in de Stotn kriagst nimm das. Wons da ned
  gfoit konnst mas ja aufeschupfn.Sunst hob i nix zum sogn,ois onere
  wurd i ah gschriebn hom. Fueh hetz im oidn Wean.Pfiat de God sche.

Bernd Wender (domois no OPVVM):
  Heast, Ruul, Du host owa an guadn Gschmockn, hawedere! Mia foit no
  ein:
  da Mokesch (fias sensible Wean)
  da Heiland (fias heilige Wean)
  de Beag und Doi Schrammeln und aundare echte Voiksmusika (fuers
    Gmiad)

  und sunst no
  de Aniada a Noa (das ma a a wend steirisch lernt)
  de Grimalkin (weus aus Wieslbuag san, wos guade Bier heakumt)
  de Knedl (san zwoa Dirola, owa a leiwaund)

Erhard Siegl (Sonderbeauftrogter zur w"odweiten Vabreitung
              des Favoritn & Blues ois Voiksmusik):
  Oiso waun ma scho aus Wean aussikuman deafst auf de ned vagessn:
  Attwenger (Turbopoika aus Obaestarreich)

Christian Pree:
[historische Aunmeakung: Des woa mei easchts Posting in da aca]
  Do haum da de Gurus zwoa scho vuele Tips gebn, oba des san ollas
  Musiktitl. Waunst in Qualtinger, a Sprechplottn, ois Beispue nennst,
  intressiern Di vielleicht a a poa Kleinkunst / Kabareh-CeDes:

  Joesy Prokopetz: "Gruess Sie, Raedl"
      Des san inzwischn 4 CDs, olle guat.
  Josef Hader: "Privat"                      
      Gaunz sche bes
  Alexander Bisenz: "Gnadenlos"
                    "Auszuckte Gfrasta"
      Da beseste von olle
  Die Hektiker: "Endlich"
      Guat, oba de redn des grausliche Hochdeitsch
  Lukas Resetarits, "I rekapituliere"
      Da Stammvota von de heitigen Kabarettisten

  Daunn muass i in Ruul no a bissl korrigiern:
  Es stimmt scho, dass da Ambros scho a bissl iwawuzelt is und seit 10
  Joar nix Gscheits mea aussabrocht hod - owa seine oidn Plottn san
  Pflicht, wia zu Beispue
  Wolfgang Ambros:   "Alles andere zaehlt net mehr"  oda
                     "Es lebe der Zentralfriedhof"

  Vua de nextn zwa CeDes muass i Di warnen: De san ganz tiaf! De san
  so tiaf im Nivoh, doss scho wieda guat san.
  I man de zwa Sempla 
    "Ganz tief"
    "Austria Curiosa"
  De san beide bei GIG-Records erschienen.

  Und daun gibts no zwa Exoten in da Musik:
  Pirron und Knapp:  Die grosse Lachparade 1+2
     redn a hochdeitsch und woan in de Fuffziga Joa, owa de Texte san 
     a Waunsinn
  H. Qualtinger / K. Sowinetz: Moritaten
    Des san Gsangln ausn vurigen Joarhundat, de wia a gesungene 
    Zeidung von Vabrechn dazoeln - weanarischa gehds fost nimma.
  Nua noamoi ois Woanung: De Musik von de zwa wiad Dia woascheinlich
  ned gfoin, waeus iwahaupt ned modern is, oba de Texte san a Hit.

Ruul:
  >Daunn muass i in Ruul no a bissl korrigiern:
  na, des loss i ned zua, bei ana gschmocksfroge gibt's ka
  ummadummbiagn ned
  >[Ambros]
  da zentreu woa leiwaund domois, owa, waunn i ma den heite auhuach
  und in bladn vua mein geistign aug siech, daunn kummt afoch ka
  stimmung mea auf aussa 'auweh, guad woast domois woifal...'

  genauso bei 'wer no ned gschbiebm hot, des kau ka guada sei' oda
  'a gulasch und a seidl bia' min danza gemeinsaum.

  da danza hod se - glaub i - a bissl bessa ghoidn, den 'tschik' von
  eam kaunn i ma a heit no auhuachn, 'de goidane kniascheim' hod a se
  a no ned vadient :)

  >[Pirron und Knapp]
  i sog nua: kummst nochn 'trepfalbod' min 'gogomobue' ham und haust
  de wesch min 'blitzo' in die 'fifi, de woschmaschin', daunn gehts da
  wieda guad.

  >[Qualtinger]
  von qualtinga hods no an haufn aundas zeig a no:
  gredt: fifi mutzenbocha, do druckt da quasi es gschichtl von da
  kanan von da oidn josefin
  nix 4 de s.c.a, do gehts o (im baeuerlichn sinn)

  gsunga: eh kloa, de scheibm mid de oidn hodan, 'gschupfta ferdl' etc
  min bronna
  'heiriche und gestriche liada' min heller gemeinsaum
  do san so gustostickln drauf wia 'krueppel san so verfuehrerisch',
  'de oide englmocharin' und 'a kruegal, a glasal, a raeuschal, a
  schwuel'

Christian Pree:
  >>Daunn muass i in Ruul no a bissl korrigiern:
  >na, des loss i ned zua, bei ana gschmocksfroge gibt's ka
   ummadummbiagn ned
  Tschuidign, oba des is ka Geschmocksfroge. Da Woifal woar afoch
  unhamlich wichtich und hot vuele beeinflusst. Drum soit man kenna, a
  waunn a heite nix mea zsammbringt - und des woa do de Froge vom
  Tscheremi.

  >[Ambros]
  Waunst noch dem gehst, derfst da nua neiche Sochn aunhuachn - da
  Breslmeia hod a guade Sochn ghobt und is daun aun da eigenen
  Beruehmtheid krepiat - deswegn san de Liada owa imma no guat.

  Oisa, waunn ma scho in Erinnerungen schwoegn - 
  "Mir geht es wie dem Jesus, mir tut das Kreuz so weh"
  "Schau do liegt a Leich im Rinnsoi, 's Bluat rinnt in Kanaeu"
  "In da Kinettn wo i schlof"

  >[danza]
  I waas ned, da Danza woa nia so mei Gschmockn.

Bernd Wender:
  >Danza woa nia so mei Gschmockn.
  na daun huach da schnoe die Leifblottn vom 79a Joa au, und daun red
  ma weida ('du sogst du host jetzt an Freind mid an Poasche, sog eam
  doch ea soi in Oasch geh und kumm wieda ham zu mia. Ea lodt di ei
  ins Theata, des zoit eam sei Vata, der Dillo, doweu is a
  schmaehstaad und schiach und blad mid seine 100 Kilo ...').

Bernd Wender (OPVVM):
  >[Pirron und Knapp]
  Die is wirklich a Waunsinn!
  >redn a hochdeitsch und woan in de Fuffziga Joa
        ^^^^^^^^^^^^^^^^^^
  Bist narrisch? Wos isn do hochdeitsch an dem Sotz z.B.:
  'Wea san denn sie daunn, sie zrupfta Bisam, wean sie ka Aumtsperson,
  hearatn se an aundan Ton ..."

Christian Pree:
  >>[Pirron und Knapp]
  >Bist narrisch? Wos isn do hochdeitsch an dem Sotz z.B.:
  >'Wea san denn sie daunn, sie zrupfta Bisam, wean sie ka
  >Aumtsperson, hearatn se an aundan Ton ..."
  Host jo recht. I hob mi, wia i des gschriebn hob, nua aun Camping
  erinnat:
  "Das wichtigste beim Camping ist ein erstklassiges Zelt,
  man braucht an Tisch an Sonnenschirm und auch ein Bett das sehr gut
  haelt
  dann braucht man Luftmatratzen Schlafsaeck einen Sessel fuer den
  Gast,
  und als Oesterreicher einen rotweissroten Fahnenmast."
  usw.usw.

Bill Hauber:
  I wea wahnsinnig - Pirron & Knapp, Danza, WOIFAL wia leiwand. Kan I
  mi no foi dra erinan. Lang is hea. Jetz bin I scho ocht joa im
  ausland oba wen ma was foed dann is a gscheide musi und a buanheidl.